မြန်မာနိုင်ငံအပေါ် အမေရိကန်လူထု သဘောထား စတင်ပြောင်းလဲ

 

အမေရိကန်ပြည်ထောင်စုနှင့် ကမ္ဘာတစ်လွှားတွင်ရှိသော AMERICAN EXPRESS ပလက်တီနမ်ကတ် ပိုင်ရှင်များထံ လစဉ်အခမဲ့ ပေးပို့သည့် DEPARTURE မဂ္ဂဇင်းတွင် မြန်မာနိုင်ငံ နိုးထလာပြီဖြစ်ကြောင်း ဆောင်းပါးတစ်ပုဒ် ပါရှိလာရာ ဆယ်စုနှစ်တစ်ခုအတွင်း ပထမဆုံးအကြိမ်အဖြစ် ထိုသို့ ဖော်ပြခံရသည့်အတွက် မြန်မာနိုင်ငံအပေါ် အမေရိကန်လူထု သဘောထား စတင်ပြောင်းလဲလာပြီဟု ဆိုနိုင်ကြောင်း မြန်မာ့အရေး လေ့လာသူများက သုံးသပ်သည်။ အမေရိကန်ပြည်ထောင်စုတွင် အဆိုပါ မဂ္ဂဇင်းရရှိသူ သုံးသိန်းခန့်ရှိပြီး အမေရိကန် အီလစ်များ၏ မြန်မာအပေါ် သဘောထား စတင်ပြောင်းလဲလာကြောင်း အချက်ပြသည့် သဘောအဖြစ် ကောက်ယူနိုင်သည်ဟု အမေရိကရောက် မြန်မာတစ်ဦးက ပြောကြားသည်။ မြန်မာနိုင်ငံတွင် သမ္မတကြီးဦးသိန်းစိန် ဦးဆောင်သည့် အရပ်ဘက် အစိုးရလက်ထက် လျင်မြန်စွာ ထွက်ပေါ်လာသည့် အပြောင်းအလဲများနှင့် ဖွံ့ဖြိုးတိုးတက်မှုများကို အမေရိကန်အစိုးရက အသိအမှတ်ပြု ကြိုဆိုကြောင်း ထုတ်ဖော်ပြောဆိုပြီး နောက်ထပ် အလားတူ ပြုပြင်ပြောင်းလဲမှုများကို ဆက်လက်လုပ်ကိုင်သွားရန် တိုက်တွန်းထားသည်။ အမေရိကန် ပြည်ထောင်စုသည် မြန်မာနိုင်ငံအပေါ် နှစ်ပေါင်းများစွာ ပိတ်ဆို့အရေးယူထားခဲ့ရာမှ သမ္မတ ဘားရက်ခ်အိုဘားမား အုပ်ချုပ်ရေးအဖွဲ့လက်ထက်တွင် နှစ်လမ်းသွား ချဉ်းကပ်မှု မူဝါဒကို ပြောင်းလဲကျင့်သုံးခဲ့သည်။ ယင်းမူဝါဒအရ တစ်ဖက်တွင် မြန်မာအစိုးရနှင့် စေ့စပ်ညှိနှိုင်းမှုများ ပြုလုပ်ပြီး အခြားတစ်ဖက်တွင် ပိတ်ဆို့အရေးယူမှုများကို ဆက်လက်ကျင့်သုံးခြင်းဖြစ်သည်။ ဖွဲ့စည်းပုံအခြေခံ ဥပဒေအရ ပေါ်ထွန်းလာသော မြန်မာအရပ်သား အစိုးရသစ်လက်ထက်တွင်လည်း အမေရိကန် အထူးသံတမန်အဖွဲ့များ လာရောက်ကာ နိုဘယ်လ်ငြိမ်းချမ်းရေးဆုရှင် ဒေါ်အောင်ဆန်းစုကြည် အပါအဝင် အစိုးရခေါင်းဆောင်များနှင့် တွေ့ဆုံဆွေးနွေးမှုများ ပြုလုပ်ခဲ့သည်ကို တွေ့ရသည်။ အမေရိကန် ပြည်ထောင်စု၏ မြန်မာနိုင်ငံဆိုင်ရာ မူဝါဒညှိနှိုင်းရေး အထူးကိုယ်စားလှယ် ဒဲရစ်မစ်ရှဲလ်လည်း ယခုနှစ် စက်တင်ဘာလတွင် တစ်ကြိမ်၊ အောက်တိုဘာလတွင် တစ်ကြိမ် မြန်မာနိုင်ငံသို့ လာရောက်ခဲ့သည်။ မြန်မာအစိုးရက ယုံကြည်ချက်ဖြင့် အကျဉ်းကျခံရသူ ၂၀၀ ကျော်ခန့်ကို လွှတ်ပေးလိုက်မှုနှင့် ပတ်သက်၍ ‘စစ်ဘက်၏ သြဇာလွှမ်းမိုးမှု အောက်တွင်ရှိသော မြန်မာနိုင်ငံ၌ ယခုနှစ်အတွင်း အားတက်စရာကောင်းသော ပွင့်လင်းမှု လက္ခဏာများ ပေါ်ထွက်လာပြီဟု ဝါရှင်တန်က ရှုမြင်ကြောင်း’ မှတ်ချက်ပေး ပြောဆိုခဲ့ကြောင်း ၂၀၁၁ ခုနှစ် အောက်တိုဘာလ ၃၁ ရက်နေ့ထုတ် The Voice ဂျာနယ်တွင် ဖော်ပြထားပါသည်။

ref: http://www.khitlunge.net.mm/news/news_detail.aspx?info_id=24891&utm_source=feedburner&utm_medium=email&utm_campaign=Feed%3A+myanmardaily+%28MyanmarDaily.net%27s+Latest+News%29