ဥရောပသမဂ္ဂ ဖွံ့ဖြိုးတိုးတက်ရေးဆိုင်ရာ မင်းကြီး အွန်ဒရေ ပီးဘော့စ်အီးယူက မြန်မာကို ဒေါ်လာသန်း၂၀၀ ကူညီမည်မြန်မာနိုင်ငံကို (၃) ရက်ကြာအလည်အပတ် ရောက်ရှိနေတဲ့ ဥရောပသမဂ္ဂ ဖွံ့ဖြိုး တိုးတက်ရေး ဆိုင်ရာ မင်းကြီး အွန်ဒရေ ပီးဘော့စ်ဟာ မြန်မာသမ္မတ ဦးသိန်းစိန်နဲ့ တနင်္လာနေ့မှာ တွေ့ဆုံခဲ့ပါတယ်။
တွေ့ဆုံဆွေးနွေးပွဲအပြီးမှာ ဥရောပသမဂ္ဂ ဖွံ့ ဖြိုးတိုးတက်ရေးဆိုင်ရာ မင်းကြီး အွန်ဒရေ ပီးဘော့စ်က မြန်မာနိုင်ငံအတွက် ငွေကြေး အကူအညီတွေ ပေးသွားမယ်လို့ ကြေငြာ ခဲ့ပါတယ်။
ဒီငွေကြေးအကူအညီဟာ ဒေါ်လာ သန်း ၂၀၀ တန်ဖိုးရှိပြီးတော့ ကျန်းမာရေး၊ပညာရေးနဲ့ အခြေခံအဆောက်အအုံတည်ဆောက်မှုတွေအတွက် ရည်ရွယ်တယ်လို့ သူက ပြောပါတယ်။
လာမယ့်ဧပြီလရွေးကောက်ပွဲဟာ လွတ်လပ်ပြီး တရားမျှတမှု ရှိရင်တော့ မြန်မာနိုင်ငံအပေါ် စီးပွားရေး ပိတ်ဆို့မှုတွေပိုပြီး လျှော့ပေးနိုင်တယ်လို့ သူကဆက်ပြီးပြောကြားသွားပါတယ်။
အီးယူရဲ့ ကန့်သတ်ချက်တွေဆက်ရှိနေသေးလို့ ဒီငွေတွေကို အစိုးရလက်ထဲတိုက်ရိုက်မပေးဘဲ ကုလသမဂ္ဂတို့လို နိုင်ငံတကာအဖွဲ့တွေကနေ ပေးမှာဖြစ်ပါတယ်။
ဖွံ့ဖြိုးမှုအတွက် ပေးတဲ့ရန်ပုံငွေဟာ လူထုဆီတိုက်ရိုက်ရောက်ဖို့ စိန်ခေါ်မှုဆိုတာအမြဲရှိပြီး အဂတိလိုက်စားမှုတွေဟာ လည်းစိုးရိမ်စရာရှိနေတာတွေကြောင့် မာလင်တို့ အက်ရှင်အိတ် တို့လို နိုင်ငံတကာ အဖွဲ့အစည်းတွေကနေတဆင့် ပေးသွားမယ်လို့ သိရတဲ့အကြောင်း ဘီဘီစီ သတင်းထောက် Rachel Harvey က ပြောပါတယ်။
မြန်မာ ဖွံ့ဖြိုးရေး ပေါ်လစီ နှီးနှော ဖလှယ်ပွဲ စတင်ကုလ သမဂ္ဂက ကြီးမှူး တဲ့ မြန်မာ နိုင်ငံ ဖွံ့ဖြိုး တိုးတက်ရေး အတွက် မူဝါဒ ချမှတ်ရေးဆိုင်ရာ သုံးရက်တာ နှီးနှော ဖလှယ်ပွဲကို နေပြည်တော်မှာ တနင်္လာနေ့က စတင်ကျင်းပခဲ့ ပါတယ်။
ဖွံ့ဖြိုးရေး နှီးနှော ဖလှယ်ပွဲ ကနေ မူဝါဒတွေ ချမှတ် နိုင်မယ်လို့ ကုလ သမဂ္ဂ မျှော်လင့်
နှီးနှော ဖလှယ်ပွဲ အဖွင့်နေ့မှာ ကုလသမဂ္ဂ အတွင်းရေးမှူးချုပ်ရဲ့ မြန်မာ နိုင်ငံ ဆိုင်ရာ အကြံပေး အရာရှိ မစ္စတာ ဗီဂျေး နမ်ဘီးယားက တက်ရောက် မိန့်ခွန်း ပြောခဲ့ပါတယ်။
ကုလသမဂ္ဂ အတွင်း ရေးမှူးချုပ် မစ္စတာ ဘန်ကီမွန်းက မြန်မာ နိုင်ငံမှာ အခု ပြုလုပ်တဲ့ ဖွံ့ဖြိုးရေး မူဝါဒ ဆွေးနွေးပွဲ ကနေ မူဝါဒ အသစ်တွေ ချမှတ် နိုင်မယ်လို့ မျှော်လင့် တယ်လို့ မစ္စတာ မန်ဘီးယားက စတင် ပြောတဲ့ အကြောင်း အဲဒီ နှီးနှော ဖလှယ်ပွဲကို တက်ရောက် ခဲ့သူ မင်္ဂလာ မြန်မာ အဖွဲ့က ဒေါက်တာ ဖုန်းဝင်းက ပြော ပါတယ်။
ချမှတ် ပြီးတဲ့ မူဝါဒတွေကို လက်တွေ့ အကောင် အထည် ဖော်တဲ့ နေရာ မှာလည်း အချက် သုံးချက်ကို တိုက်တွန်း သွား တယ်လို့ သူက ပြောပါတယ်။
အဲဒါတွေ ကတော့ လူတွေ အများစု ပါဝင်မှုကို အကြောင်းပြုပြီး အင်အား ရယူဖို့၊ အချင်းချင်း ပူးပေါင် ဆောင်ရွက်ပြီး အင်အား ရှိအောင်လုပ်ကြဖို့နဲ့ အချင်းချင်း ညီညီ ညွတ်ညွတ် အင်အား တည်ထောင်ဖို့ စတာတွေ ဖြစ်ပြီး ဒီ အခြေခံ အချက်သုံးချက်ကို တည်ဆောက် နိုင်မယ် ဆိုရင် မဖြစ်နိုင်ဘူးလို့ ယူဆ ထားတာတွေ ကိုတောင် အောင်မြင်နိုင် လိမ့်မယ်လို့ ပြောသွားကြောင်း ဒေါက်တာ ဖုန်းဝင်းက ပြောပါတယ်။
နှီးနှော ဖလှယ်ပွဲ ကို မြန်မာ အစိုးရ ဘက်က ဒုတိယ သမ္မတ ဒေါက်တာ စိုင်းမောက်ခမ်း၊ စက်မှု ဝန်ကြီး၊ ကျန်းမာရေး ဝန်ကြီး၊ ပညာရေး ဝန်ကြီး စတဲ့ ဝန်ကြီးတွေ အပါအဝင် ဝန်ကြီး ဌာန အသီးသီးက ဝန်ကြီး တွေ တက်ရောက် ခဲ့သလို ကုလသမဂ္ဂ ဘက်ကတော့ မစ္စတာ ဗီဂျေး နမ်ဘီးယား အပြင် UNDP လက်ထောက် အတွင်းရေးမှူးချုပ် မစ္စတာ ဂျေအေ ချီဘား၊ နိုဘယ် ဆုရှင် စီးပွားရေး ပါမောက္ခ ဂျိုးဇက်ဖ် စတစ် ဂလစ်ရ်ှနဲ့ ပြည်တွင်း ပြည်ပက ပညာရှင်တွေ တက်ရောက် ခဲ့ကြ ပါတယ်။
လူ့အခွင့်အရေးကော်မရှင်ဥက္ကဌ ဦးဝင်းမရမြန်မာလူ့အခွင့်အရေးကော်မရှင် ဥက္ကဌ ထိုင်းရောက်ထိုင်းနိုင်ငံကို ရောက်ရှိနေတဲ့ မြန်မာလူ့အခွင့်အရေးကော်မရှင် ဥက္ကဌ ဦးဝင်းမရနဲ့ အဖွဲ့ဝင် ဦးညွန့်ဆွေတို့ ဟာ ဖေဖေါ်ဝါရီလ ၁၃ ရက်နေ့က ထိုင်းလူ့အခွင့်အရေးဆောင်ရွက်ချက်တွေကို လေ့လာဖို့ အာဆီယံ လူ့အခွင့်အရေးကော်မရှင်မှာ မြန်မာနိုင်ငံ အဖွဲ့ဝင်ဖြစ်ရေး ဆွေးနွေးဖို့ ထိုင်းလူ့အခွင့်အရေးကော်မရှင်ကို လာရောက်ခဲ့ကြပါတယ်။
ထိုင်းလူ့အခွင့်အရေးကော်မရှင်ရဲ့ ဖွဲ့စည်းပုံ လူ့အခွင့်အရေးချိုးဖေါက်မှု တိုင်တန်းစာတွေကို လက်ခံပုံ၊ နဲ့ လုပ်ငန်းကော်မီတီက ဘယ်လိုစစ်ဆေးသလဲဆိုတာတွေကို မေးမြန်းလေ့လာခဲ့ကြတယ်လို့ ဆိုပါတယ်။
ထိုင်းနိုင်ငံရောက်မြန်မာရွေ့ပြောင်းအလုပ်သမားအရေးတွေနဲ့ပတ်သက်လို့ နှစ်နိုင်ငံ ပူးပေါင်းဆောင်ရွက်မှုတွေရှိနေပြီး လူ့အခွင့်အရေးချိုးဖေါက်မှုတွေနဲ့ ပတ်သက်လို့ ကော်မရှင်အနေနဲ့ အကြံပြုချင်တာကို အကြံပြုတင်ပြပေးနိုင်တယ်လို့ မြန်မာ လူ့အခွင့်အရေးကော်မရှင် ဥက္ကဌက ဘီဘီစီကို ပြောပါတယ်။
၂၀၁၁ခု ဒီဇင်ဘာ ၃၁ ရက်နေ့အထိ မြန်မာနိုင်ငံတွင်းမှာ လူ့အခွင့်အရေးချိုးဖေါက်မှုဆိုင်ရာ တိုင်တန်းစာ တထောင်ကျော် လက်ခံရရှိခဲ့ပြီး အတော်များများဟာ မြေယာသိမ်းယူမှု၊ တရားသူကြီးတချို့ရဲ့မသမာမှု၊ ခရိုင်နဲ့ မြို့နယ်အာဏာပိုင်တချို့ရဲ့ ဖေါက်ပြန်မှုတွေကို တိုင်းတန်းထားတာဖြစ်တယ်လို့ ဆိုပါတယ်။
အဲဒီထဲက တိုင်တန်းစာ ၃၀ကျော်ကို ဖြေရှင်းပေးနိုင်ခဲ့တယ်လို့ ဦးဝင်းမရက ဘိဘီစီကို ပြောခဲ့ပါတယ်။
ဂရိချွေတာရေးအစီအစဉ်ကြောင့် ရှယ်ယာဈေးတက်ဂရိရဲ့ ချွေတာရေးအစီအစဉ်သစ်ဟာ ရှယ်ယာဈေးကွက်ကို အကြိုးသက်ရောက်
ဂရိအစိုးရရဲ့ နောက်ဆုံးအတည်ပြုလိုက်တဲ့ တင်းကျပ်တဲ့ ခြိုးခြုံ ချွေတာရေး အစီအစဉ် တွေဟာ တနင်္လာနေ့ အစုရှယ်ယာ ဈေးကွက်မှာ အပေါင်းလက္ခဏာဆောင်တဲ့ တုံပြန်မှုတွေဖြစ်လာစေပါတယ်။
တိုကျိုနဲ့ ဟောင်ကောင်ရှယ်ယာဈေးကွက်မှာ တော့ ဝ.၅ ရာခိုင်နှုံး တက်လာပြီးဈေးပိတ် သွားပါတယ်။
ဥရောပ အစောပိုင်းကုန်သွယ်မှုရဲ့ ဘဏ်လုပ်ငန်း ဆိုင်ရာ ရှယ်ယာ ဈေးကွက်တွေမှာလည်း နလံထူနိုင်မှုတွေရှိလာပါပြီ။
တနင်္ဂနွေနေ့က ဂရိပါလီမန်အမတ် သုံးပုံ နှစ်ပုံ က ဒီချွေတာရေးအစီအစဉ်တွေကို မဲပေး အတည်ပြု ခဲ့ပါတယ်။
ဒီအစီအစဉ်တွေကိုလုပ်ရင် ယူရို ၁၃၀ ဘီလီယံ ထောက်ပံ့ကူညီမယ်လို့ ယူရိုဇုန်နဲ့ နိုင်ငံတကာ ငွေကြေး ရန်ပုံငွေ အဖွဲ့တွေက တောင်းဆိုနေခဲ့တာဖြစ်ပါတယ်။
ဒုတိယအကြိမ်မြောက် ဂရိနိုင်ငံက အကောင်အထည်ဖော်တဲ့ ဒီချွေတာရေးအစီအစဉ်ကို ဥရောပနိုင်ငံတွေ အထူးသဖြင့် ဂျာမနီနိုင်ငံက အားပေးကြိုဆိုခဲ့ပါတယ်။
ဒါပေမဲ့ လစာငွေလျော့ချမှု၊ အလုပ်နဲ့ပင်စင် လျော့ချမှု ကိုဖြစ်စေတဲ့ ဒီချွေတာရေးအစီအစဉ် ကို မကျေနပ်ကြတဲ့ အတွက် ဂရိနိုင်ငံသားတွေကတော့ အကြမ်းဖတ် ဆန္ဒပြမှုတွေ ပြုလုပ်နေပါတယ်။
မလေးရှားမှာ မြန်မာတချို့ ဖမ်းဆီးခံရမလေးရှားမှာ တရားမဝင် အလုပ်လုပ်ကိုင် နေတဲ့ နိုင်ငံခြားသား အလုပ် သမားတွေကို ဖမ်းဆီး နေရာမှာ မြန်မာ နိုင်ငံသားတွေ အတော် များများ လည်း ဖမ်းဆီး ခံခဲ့ရ ပါတယ်။
စနေနေ့ ကစပြီး ကွာလာလမ်ပူ မြို့ထဲမှာ မလေးရှား ရဲတွေက ကားတွေနဲ့ ပိတ်ဆို့ ပြီးဖမ်းနေတဲ့ အတွက် တခြား နိုင်ငံခြားသား အလုပ်သမား တွေနဲ့ အတူ မြန်မာ နိုင်ငံသား များလည်း အများအပြား ဖမ်းဆီး ခံခဲ့ရ ပါတယ်။
မျက်မြင် မြန်မာ တဦးကတော့ ရထားဂိတ် နားမှာ ရဲတွေ အများကြီးက ဖမ်းနေကြ တာဖြစ်ပြီး မြန်မာ ၃၀၀ ကနေ ၄၀၀ လောက် တွေ့ခဲ့ ရတယ်လို့ ဆိုပါတယ်။ အခုလို ဖမ်းနေတာကလဲ စီမံချက် အရ တရားမဝင် အလုပ်လုပ် နေတဲ့ သူတွေကို ဖမ်းတာ ဖြစ်တယ်လို့ သူက ပြောပါတယ်။
ဒါပေမယ့်လဲ ဖမ်းတဲ့ နေရာမှာ ယူအဲန် ကဒ် ကိုင်ထား သူတွေရာ၊ အလုပ်သမား လက်မှတ် ရှိတဲ့ လူတွေရောကို သိမ်းကျုံး ဖမ်းဆီးပြီး ရဲစခန်း ရောက်မှ တရားဝင် ကဒ် ကိုင်ဆောင် ထားသူတွေကို ပြန်လွှတ် ပေးတယ်လို့ လဲ ဆိုပါတယ်။
အခု လို ရဲတွေက စားသောက်ဆိုင် တွေနဲ့ စက်ရုံတွေကို ဝင်စီးပြီး ဖမ်းနေကြတဲ့ အတွက် မြန်မာတွေ အလုပ် မလုပ်ရဲကြ၊ အပြင်မထွက် ရဲကြဖြစ်နေကြ တယ်လို့လဲ အဲဒီက မြန်မာ အလုပ်သမား တွေရဲ့ အခြေအနေကို ပြောပြသွား ပါတယ်။
တရားဝင် လက်မှတ် မရှိတဲ့ အတွက် ဖမ်းဆီးခံ ခဲ့ရတဲ့ မြန်မာ နိုင်ငံသား တွေကိုတော့ ရဲစခန်းကို ပို့ပြီး ရဲစခန်းကနေ မြန်မာ နိုင်ငံကို ပြန်ပို့ မှာ ဖြစ်တယ်လို့ သိရပါတယ်။
ဆီးရီးယားမှာ ငြိမ်းချမ်းရေး တပ်ဖွဲ့ချဖို့ အဆိုပြုဆီးရီးယား အစိုးရက မြို့တွေထဲမှာ တင့်ကားနဲ့ လက်နက်ကြီး တပ်ဖွဲ့တွေ စေလွှတ်ထား
ဆီးရီးယား နိုင်ငံက အကြမ်းဖက် မှုတွေ ရပ်ဆိုင်း သွားဖို့ အတွက် ကုလ သမဂ္ဂ ပါဝင်တဲ့ ငြိမ်းချမ်းရေး ထိမ်းသိမ်းရေး အဖွဲ့တွေ စေလွှတ်ဖို့ အာရပ် အဖွဲ့ချုပ် က တိုက်တွန်း လိုက်ပါတယ်။
အဲဒီ ကြေညာချက် ထဲမှာ ပါဝင်တဲ့ အချက် တွေနဲ့ ပတ်သက်ပြီး အစည်းဝေး ထဲမှာ ဘယ်လောက် သဘောထား ကွဲလွဲ မှုတွေ ရှိတယ် ဆိုတာကို မသိရသေး ပေမယ့် အခုချိန်မှာ အရေးကြီး တာက အဲဒီ ဆုံးဖြတ်ချက် ကို တကယ် လက်တွေ့ အကောင် အထည် ဖော်နိုင် မှာလား ဆိုတဲ့ အချက်ပါ။
ဒီကြေ ညာချက် ထဲမှာ ဆီးရီးယား အတိုက်အခံ တွေနဲ့ ဆက်သွယ်ရေး လမ်းကြောင်း ဖွင့်ပြီး ငွေရေး ကြေးရေး အရ အကူ အညီ ပေးဖို့ တိုက်တွန်းချက် လည်း ပါဝင် ပါတယ်။
ဒါ့အပြင် အပစ်အခတ် ရပ်စဲရေး ကို စောင့်ကြည့် ထိမ်းသိမ်း ဖို့ အတွက် ကုလ သမဂ္ဂရဲ့ ဆုံးဖြတ်ချက် နဲ့ ငြိမ်းချမ်းရေး ထိမ်းသိမ်းမယ့် တပ်ဖွဲ့ ကို ချထား ဖို့လည်း တိုက်တွန်း ထားပါတယ်။
ဘယ်လို တပ်ဖွဲ့မျိုး ဆိုတာ ကိုတော့ တိတိကျကျ ဖော်ပြ မထား ပါဘူး။ အာရပ် အဖွဲ့ချုပ် အဖွဲ့ဝင် တွေ ကြားမှာ သဘော မတူညီ မှုတွေ ရှိနေလို့ မဖော်ပြ တာလည်း ဖြစ်နိုင် ပါတယ်။
ဒါပေမယ့် အာရပ် အဖွဲ့ချုပ် အဖွဲ့ဝင် နိုင်ငံတွေ ကိုယ်တိုင်က ဆီးရီးယား မှာ အဲဒီလို တပ်ဖွဲ့ ချထားဖို့ ပြော နေတာကို ကြည့်ရင် သမ္မတ အာဆတ် ဟာ ဘယ်လောက် အထီးကျန် ဖြစ်နေ သလဲ ဆိုတာကို မြင်နိုင် ပါတယ်။
ဒီ ကြေညာချက် ထဲမှာ ဆီးရီးယား ပြည်သူ တွေကို ကာကွယ် စောင့်ရှောက် ဖို့ အတွက် ဆီးရီယား အစိုးရ မှာ တာဝန် ရှိတယ်လို့ ဖော်ပြ ထားပြီး အစိုးရ တပ်ဖွဲ့ တွေကို မြို့တွေ ပေါ်က နေ ဆုတ်ခွာ ပေးဖို့ လည်း တောင်းဆို ထားပါတယ်။
ဒါ့အပြင် ဆီးရီးယား အစိုးရ နဲ့ သံတမန် အဆက်အသွယ် တွေဖြတ်ပြီး အရေးယူ ပိတ်ဆို့မှု တွေ တိုးမြှင့် ဆောင်ရွက် ကြဖို့ ကိုပါ တိုက်တွန်း ထားပါတယ်။
မကြာ သေးခင် ကဘဲ အာရပ် အဖွဲ့ချုပ် ရဲ့ အစီအစဉ် နဲ့ ပတ်သက်လို့ လုံခြုံရေး ကောင်စီမှာ မဲခွဲ ခဲ့စဉ်က ရုရှနဲ့ တရုတ် နှစ်နိုင်ငံ က ဗီတို အာဏာနဲ့ ပယ် ချ ခဲ့တဲ့ ကြားမှာဘဲ၊ ဆီးရီးယား နိုင်ငံ အရေးဟာ လုံခြုံရေး ကောင်စီကို နောက်တကြိမ် ရောက်လာ နိုင်တဲ့ အလားအလာ ရှိနေ ပါတယ်။
အဲဒီလို နောက်တကြိမ် ရောက်လာတဲ့ အခါ ကျရင် ရုရှ အနေနဲ့ သူ့ရဲ့ မိတ်ဆွေ ဟောင်း လည်းဖြစ် ကုန်သွယ်ဖက် လည်း ဖြစ်တဲ့ အာဆတ် အစိုးရ ကို သံတမန် လက်နက်နဲ့ ဆက်ပြီး ကာကွယ် နေမှာလား ဆိုတာ နောက်တကြိမ် မေးခွန်း ထုတ်စရာ ဖြစ်လာလိမ့်မယ်လို့ ကိုင်ရို မြို့မှာရှိတဲ့ ဘီဘီစီသတင်းထောက် က ဆိုပါတယ်။
အီရတ်က အဲလ်ခိုင်းဒါး တချို့ ဆီးရီးယားကိုရွှေ့အီရတ် နိုင်ငံ ထဲမှာ ရှိတဲ့ အဲလ်ခိုင်းဒါး နဲ့ တခြားလက်နက်ကိုင် အဖွဲ့တွေ ဟာ သူတို့ရဲ့ လှုပ်ရှားမှုတချို့ကို အီရတ်ကနေ ဆီးရီးယား ဘက်ကို ရွှေ့ပြောင်း သွားခဲ့ကြပြီ ဖြစ်တယ် လို့အီရတ် အစိုးရ အရာရှိတဦးက ဘီဘီစီကို ပြောပါတယ်။
အီရတ် ဒုတိယ ပြည်ထဲရေး ဝန်ကြီး အဒ်ဒန် အဲလ် အာဆာဒီက အဲလ် ခိုင်းဒါးက သူ့ရဲ့ နောက်လိုက် တွေကို အီရတ်ထဲကနေ ဆီးရီးယား အပါအဝင် တခြား နိုင်ငံတွေကိုရွှေ့ဖို့ ညွှန်ကြားခဲ့တဲ့ နောက်မှာ အီရတ် နိုင်ငံ အတွင်းမှာလဲ တိုက်ခိုက် ခံရမှုတွေ လဲ ကျဆင်းလာတာ တွေ့ရတယ်လို့ ဆိုပါတယ်။
နောက်ပြီး အီရတ်ရဲ့ အနောက်ဘက် အိမ်နီးချင်းနိုင်ငံရဲ့ အခြေအနေဟာလဲ မတည်ငြိမ်ဘဲ အချိန်မရွေး တခုခု ထဖြစ် နိုင်တယ်လို့ လဲ ပြောပါတယ်။
အစောပိုင်းတုန်းကတော့ အဲလ် ခိုင်းဒါး ရဲ့ ခေါင်းဆောင် အိုင်မန် အဲလ် ဇဝါဟာရီ က ဆီးရီးယား အုံကြွမှုကို ထောက်ခံကြောင်း ပြောသွား ခဲ့ပါတယ်။
ဂရိမှာ ခြိုးခြံရေး အစီအမံကို အတည်ပြုဂရိ နိုင်ငံ မှာတော့ အစိုးရရဲ့ အငြင်းပွား ဖွယ်ရာ ခြိုးခြံ ချွေတာရေး အစီအမံသစ် တွေကို ပါလီမန်က အတည်ပြုပေး လိုက်ပြီ ဖြစ်ပါတယ်။
ဒါကတော့ ယူရိုဇုန်နဲ့ နိုင်ငံတကာ ငွေကြေး ရန်ပုံငွေ အဖွဲ့တွေ ယူရို ၁၃၀ ဘီလီယံ ကူငွေ တွေပေးဖို့ အတွက် တောင်းဆိုထားချက်တွေ အတိုင်း လုပ်ခဲ့ကြ တာလဲ ဖြစ်ပါတယ်။
ဒီ ခြိုးခြံ ချွေတာ ရေး အစီအမံ သစ်တွေနဲ့ ပတ်သက်လို့ မဲခွဲ ဆုံးဖြတ်ဖို့ ပါလီမန် အတွင်းမှာ အမတ်တွေ အကြား ဆွေးနွေး နေကြစဉ် မှာပဲ ပါလီမန် အပြင်ဘက် မှာလဲ ဆန္ဒပြသူ တွေနဲ့ ရဲတွေ အကြား တိုက်ခိုက် မှုတွေ ဖြစ်ခဲ့ ကြပါတယ်။ ရဲတွေ ဘက်က မျက်ရည်ယို ဗုံးတွေ သုံးခဲ့သလို ဆန္ဒပြသူ တွေဘက်ကလဲ ခဲတွေ၊ ဓာတ်ဆီဗုံးတွေ၊ မီးကျည်တွေနဲ့ ပြန်ပစ်ခဲ့ ကြပါတယ်။ လူတချို့ ထိခိုက် ဒဏ်ရာတွေ ရရှိခဲ့ သလို အဆောက်အအုံ တချို့လဲ မီးတင်ရှို့ ခံခဲ့ရပါတယ်။ ဒီတခါ တိုက်ခိုက်မှုတွေက တော့ ၂၀၀၈ ခုနှစ် ကစပြီး အဆိုးဝါးဆုံး လဲ ဖြစ် ပါတယ်။
ဂရိ နိုင်ငံရဲ့ ဝန်ကြီးချုပ် လူးကပ်စ် ပါပါ ဒမ်းမို့စ်က တော့ အားလုံး ထိန်းထိန်းသိမ်းသိမ်း ရှိကြဖို့ တိုက်တွန်း ထားပြီး ဒီလို တိုက်ခိုက်မှုမျိုး တွေဟာ ဒီမိုကရေစီ မဆန်ဘူး လို့ဆိုလိုက် ပါတယ်။
ဆေ့ဖ် အဲလ် အစ္စလာမ် ကဒါဖီဆေ့ဖ် ကဒါဖီကို အကျဉ်းထောင် ပြောင်းမယ်လစ်ဗျား နိုင်ငံမှာတော့ ဗိုလ်မှူးကြီး ကဒါဖီရဲ့ သား ဆေ့ဖ် အဲလ် အစ္စလာမ်ကို လာမဲ့ ၂ လ အတွင်းမှာ ရုံးတင်စစ်ဆေး မှုတွေလုပ်ဖို့ အတွက် ထရစ်ပိုလီ မြို့ထဲက အကျဉ်းထောင် တခုကို ရွေ့ပြောင်း ထားရှိ သွားမယ်လို့ ကြားဖြတ်အစိုးရ အာဏာပိုင် တွေက ဆိုပါတယ်။
အမျိုးသား အသွင်ပြောင်း ကောင်စီရဲ့ အကြီးအကဲ မူစတာဖာ အဗ္ဗဒူလ် ဂျာလီ က ဆေ့ဖ် အဲလ် အစ္စလာမ်ကို ဖမ်းမိခဲ့ပြီး နောက် ၃ လ အကြာက စပြီး စစ်ဆေး မှုတွေ လုပ်နေတယ်လို့ ဆိုပါတယ်။
သူ့ကို တချိန်က ဖခင် ဖြစ်သူရဲ့ အရိုက်အရာကို ဆက်ခံမယ့်သူလို့ ရှုမြင်ထား ခဲ့ကြတာလဲ ဖြစ်ပါတယ်။ ဒါပေမယ့်လဲ ဇင်တန်မြို့မှာ ဘက်ဒိုအင် လူမျိုး အယောင်ဆောင်ပြီး ရုပ်ဖျက် ထားခဲ့တဲ့ သူ့ကို ဒေသတွင်း လက်နက်ကိုင် အဖွဲ့တွေက ဖမ်းမိခဲ့ပြီး ထဲက အခုလို ထိန်းသိမ်း ခံနေရတာ ဖြစ်ပါတယ်။
တကယ်လို့ သူ့မှာ အပစ်ရှိတယ်လို့ စစ်ဆေး တွေ့ရှိခဲ့ရင်တော့ သေဒဏ် အပစ်ပေး ခံရမှာ ဖြစ်ပါတယ်။ မစ္စတာ အဗ္ဗဒူလ် ဂျာလီကတော့ တရားမျှတစွာ စီရင်ဆုံးဖြတ် သွားမယ်လို့ ဆိုထား ပါတယ်။
ရေနံပိုက်လိုင်းတလျှောက် လမ်းသွားနေတဲ့ နိုင်ဂျီးရီးယားအမျိုးသမီးတဦးနိုင်ဂျီးရီးယား ဆင်းရဲမှုနှုန်း မြင့်တက်နိုင်ဂျီးရီးယားနိုင်ငံရဲ့ စီးပွားရေးဟာ အတော်ကောင်းမွန်လာပေမယ့် အခု နောက်ဆုံးထွက်လာတဲ့ စာရင်းဇယားတွေ အရတော့ ဆင်းရဲမွဲတေမှု တွေဟာ မြင့်တက် နေပါတယ်။
နိုင်ငံသားသန်းပေါင်း ၁၀၀ နီးပါးဟာ တနေ့ လုပ်စာ ၁ ဒေါ်လာထက် နည်းတဲ့ဝင်ငွေနဲ့ ရှင်သန်နေရတယ်လို့ သိရပါတယ်။
၂၀၀၄ တုန်းက အခြေခံစားဝတ်နေရေးအတွက် တတ်နိုင်သူ တွေ ၅၅ ရာခိုင်နှုန်းပဲရှိခဲ့ပါတယ်။
ဒါပေမဲ့ ၂၀၁၀ မှာတော့ ၆၁ ရာခိုင်နှုန်းအတိ မြင့်တက်လာတယ်လို့ နိုင်ဂျီးရီးယားနိုင်ငံရဲ့ အမျိုးသားစာရင်းဌာနက ပြောပါတယ်။
နိုင်ဂျီးရီးယားနိုင်ငံဟာ အာဖရိကရဲ့ အကြီးဆုံးရေနံတင်ပို့တဲ့နိုင်ငံဖြစ်ပါတယ်။
ဒါပေမဲ့ လူနေမှုအဆင့်အတန်း ကွာဟာမှုတွေဆက်ပြီး ကြီးမားနေရင်တော့ ဒီဆင်းရဲ မွဲတေမှုဟာ ပိုပြီးဆိုးရွားဖို့ပဲ ရှိတယ်လို့ လေ့လာသုံးသပ်သူတွေက ပြောပါတယ်။
ကြားဖြတ်ရွေးကောက်ပွဲ ရလဒ်အပေါ် အီးယူတုံ့ပြန်မည်
By မသင်းသီရိ
ဧပြီလ ၁ ရက်နေ့မှာ လုပ်မယ့် ကြားဖြတ် ရွေးကောက်ပွဲရဲ့ လွတ်လပ်မျှတမှုနဲ့ ရလဒ်ကို ကြည့်ကာ မြန်မာပြည်အတွက် ပြုပြင်ပြောင်းလဲမှုတွေ ပိုပြီး တိုးမြင့် လုပ်ဆောင်ပေးသွားမယ်လို့ မြန်မာနိုင်ငံကို ရောက်နေတဲ့ အီးယူ ဥရောပသမဂ္ဂရဲ့ ဖွံ့ဖြိုးမှုဆိုင်ရာ ကော်မရှင်နာမင်းကြီး Andris Piebalgs က ပြောသလို အစိုးရအနေနဲ့ ကြားဖြတ် ရွေးကောက်ပွဲတွေကို တရားမျှတစွာ ကျင်းပနိုင်ဖို့ကိုလည်း စီစဉ်ထားတဲ့အကြောင်း ပြည်သူ့လွှတ်တော် ဥက္ကဋ္ဌ သူရဦးရွေမန်းက ပြောပါတယ်။ ဒီကနေ့ နေပြည်တော်မှာ သူတို့ နှစ်ဦးတွေ့ဆုံအပြီး သတင်းထောက်တွေကို အခုလို ပြောလိုက်တာလည်း ဖြစ်ပါတယ်။ ဒီအကြောင်းကို မသင်းသီရိက တင်ပြထားပါတယ်။
ဖေဖော်ဝါရီလ ၁၂ ရက်နေ့က မြန်မာနိုင်ငံကို ရောက်လာတဲ့ အီးယူ ဥရောပသမဂ္ဂရဲ့ ဖွံ့ဖြိုးရေးဆိုင်ရာ ကော်မရှင်နာမင်းကြီး Andris Piebalgs ဟာ နေပြည်တော်မှာ ပြည်သူ့လွှတ်တော်ဥက္ကဋ္ဌ သူရဦးရွှေမန်းနဲ့ ဒီကနေ့ မနက်က တွေ့ဆုံပါတယ်။ အဲဒီနောက် သတင်းထောက်တွေကို သူတို့နှစ်ဦး တွေ့ဆုံပြီး သူတို့ ဆွေးနွေးကြတဲ့ မြန်မာ့အရေး အခြေအနေတွေကို ရှင်းပြရာမှာတော့ ဧပြီလ ၁ ရက်နေ့မှာလုပ်မယ့် ကြားဖြတ် ရွေးကောက်ပွဲတွေဟာ လွတ်လပ်ပြီး တရားမျှတဖို့အတွက် အီးယူက တိုက်တွန်းတယ်ဆိုတာ အပါအ၀င် တိုင်းရင်းသား ဒေသတွင်းက ငြိမ်းချမ်းရေးတွေနဲ့ ပြောင်းလဲမှုတွေနဲ့အတူ တိုးတက်မှုရှိလာတဲ့ မြန်မာ့အရေး အခြေအနေတွေကြောင့် အီးယူက ပိတ်ဆို့မှုတွေကို လျှော့ချပေးထားတယ် ဆိုတဲ့အကြောင်းတွေကို မစ္စတာ Andris Piedalgs က ရှင်းပြခဲ့တယ်လို့ သတင်းထောက်တွေနဲ့ တွေ့ဆုံပွဲကို ကိုယ်တိုင် သတင်းသွားယူခဲ့တဲ့ ပြည်တွင်း သတင်းထောက်တစ်ဦးက ပြောပါတယ်။
“ကြားဖြတ်ရွေးကောက်ပွဲ ရလဒ်ကို စောင့်ကြည့်ချင်တယ်ပေါ့နော်။ အဲဒီလို စောင့်ကြည့်ပြီးတော့ ကောင်းတာနဲ့အမျှ မြန်မာပြည်အတွက် ကောင်းတဲ့ အပြောင်းအလဲကြီးတွေ ဖြစ်လာမယ်လို့ သူက ပြောတယ်။ နောက်ပြီးတော့ လောလောဆယ်မှာလည်း အီးယူ အဖွဲ့ဝင်နိုင်ငံတွေက ပိတ်ဆို့မှုတချို့ကို လျှော့ချဖို့အတွက် သူတို့ စီစဉ်နေပြီလို့ ပြောပါတယ်။ နောက်ပြီးတော့ ယူရိုသန်း ၁၅၀ မြန်မာနိုင်ငံအတွက် ကူညီမယ်ဆိုတာလည်း ပြောပါတယ်။ ငြိမ်းချမ်းရေးအတွက် တော်တော်များများ ရထားတာကို သူတို့ အီးယူအနေနဲ့ ၀မ်းမြောက်ဝမ်းသာ ရှိတဲ့အကြောင်း ကျန်နေတဲ့ ကချင်တို့လို ပဋိပက္ခမှုတွေကိုလည်း အကုန်လုံး ငြိမ်းချမ်းအောင် ဆက်လုပ်သွားဖို့ တိုက်တွန်းကြောင်း ပြောပါတယ်။”
ပြည်သူ့လွှတ်တော် ဥက္ကဋ္ဌ သူရဦးရွှေမန်းကလည်း ကြားဖြတ်ရွေးကောက်ပွဲတွေမှာ တရားမျှတမှု ရှိစေဖို့အတွက် အစိုးရက စီစဉ်ထားတဲ့အကြောင်းတွေကိုလည်း ပြန်ပြီးတော့ ရှင်းပြခဲ့တယ်လို့ သတင်းထောက်က ပြောပါတယ်။
“ကျနော်တို့ လာမယ့် ကြားဖြတ်ရွေးကောက်ပွဲနဲ့ ပတ်သက်ပြီးတော့ သူ ကတိပေးတာပါ။ လွတ်လပ်ပြီး တရားမျှတတဲ့ ရွေးကောက်ပွဲဖြစ်အောင် သူ ဖြစ်အောင် လုပ်ပါ့မယ်လို့ ကတိပေးတာရယ်၊ နောက်ပြီးတော့ ဒီမိုကရေစီ နိုင်ငံတော်ကို မဖြစ်ဖြစ်အောင် သူ လုပ်သွားမယ်ဆိုတာရယ်၊ အဲဒီလိုလုပ်ဖို့အတွက် လိုအပ်တဲ့ အကူအညီတွေကို အီးယူဘက်ကလည်း ကူညီဖို့ဆိုတာရယ်၊ နောက် ဥရောပပါလီမန် အနေနဲ့ အပြန်အလှန် ကိုယ်စားလှယ်တွေ လေ့လာခွင့်၊ အပြန်အလှန် အကြံဉာဏ်တောင်းခွင့်၊ လိုအပ်တာတွေကို ကူညီခွင့် ကမ်းလှမ်းတာရယ်။ အီးယူဘက်ကလည်း အဲဒီလို ကမ်းလှမ်းပါတယ်။”
ဒါ့အပြင် ကျန်နေသေးတဲ့ နိုင်ငံရေး အကျဉ်းသားတွေ လွှတ်ပေးရေးနဲ့ ပတ်သက်လို့ သူတို့နှစ်ဦး ရှင်းပြတာကတော့ -
“သူတို့ပြောတာက အတိုက်အခံ ပါတီတွေက တောင်းဆိုထားတဲ့ အကျဉ်းသားတချို့ ကျန်သေးတယ် ဆိုတဲ့ ကိစ္စနဲ့ပတ်သက်ပြီး ဦးရွှေမန်းကို မေးတယ်။ ဦးရွှေမန်းကတော့ ပြောတယ်လေ။ သူတို့ NLD ပါတီက တင်ထားတဲ့ စာရင်းအတိုင်းပဲ အားလုံးကို လွှတ်ပေးထားပါပြီတဲ့။ တကယ်လို့ ကျန်နေသေးတယ်ဆိုရင် ထပ် တင်ပေါ့နော်။ ထပ်တင်ရင် သူတို့ သက်ဆိုင်ရာ အဖွဲ့အစည်းတွေနဲ့ ညှိနှိုင်းပြီးတော့ လွှတ်ပေးဖွယ်ရာ၊ “လွှတ်ပေးဖွယ်ရာ” လို့ သူ သုံးတယ်။ လွှတ်ပေးဖွယ်ရာ ရှိတယ်လို့ ပြောပါတယ်။”
ပြည်တွင်း သတင်းထောက်တစ်ဦး ပြောပြခဲ့တာပါ။ ဒီပွဲမှာ သူတို့ ဆွေးနွေးခဲ့ကြတဲ့ အကြောင်းအရာ တွေကိုသာ ရှင်းပြတာ ဖြစ်ပြီးတော့ သတင်းထောက်တွေဘက်က မေးခွန်းတော့ မေးခွင့်မရဘူးလို့ ပြောပါတယ်။ အဲဒီနောက်ပိုင်း အီးယူအဖွဲ့ဟာ နေပြည်တော်က MICC မှာ ဆင်းရဲမွဲတေမှု လျှော့ချရေး ဆွေးနွေးပွဲတစ်ခုကို မြန်မာနိုင်ငံက စီးပွားရေးပညာရှင်တွေ ဆွေးနွေးနေပါတယ်။ မနေ့ကဆိုရင် မစ္စတာ Piedalgs ဟာ သတင်းထောက်တွေကို အီးယူ ဥရောပ သမဂ္ဂက မြန်မာနိုင်ငံအတွက် ကူညီပေးနေတဲ့ ဖွံ့ဖြိုးရေးဆိုင်ရာကိစ္စတွေကို တိုးမြှင့်မယ့်အကြောင်းကိုလည်း အခုလို ရှင်းပြခဲ့ပါတယ်။
“မြန်မာနိုင်ငံမှာ ဖွံ့ဖြိုးရေး အစီအစဉ်တွေက အောင်မြင်နိုင်တယ်လို့ လူတိုင်းက ယုံကြည်ထားပါတယ်။ အကြောင်းက မြန်မာနိုင်ငံသားတွေ အနေနဲ့ ဒီမိုကရေစီ၊ လူ့အခွင့်အရေး နဲ့ စီးပွားရေး ဖွံ့ဖြိုးတိုးတက်မှုကို လိုလားကြလို့ပဲ ဖြစ်ပါတယ်။ တချိန်တည်းမှာပဲ ကုလသမဂ္ဂ အဖွဲ့အစည်း အနေနဲ့လည်း ဒီ ဖွံ့ဖြိုးရေး အစီအစဉ်တွေကို လက်ရှိစွမ်းအားနဲ့ စတင် လုပ်ဆောင်ဖို့ အဆင်သင့် ရှိကြပါတယ်။”
ဒါ့အပြင် ပညာရေး၊ ကျန်းမာရေးနဲ့ အသက်မွေးဝမ်းကြောင်းဆိုင်ရာ ကဏ္ဍသုံးရပ်နဲ့ ပတ်သက်လို့ ဆွေးနွေးတဲ့အပိုင်းကိုလည်း ရှင်းပြသွားပါတယ်။
“အခုထိ ကျနော်တို့ ဆွေးနွေးခဲ့တာ ကဏ္ဍ သုံးရပ်ရှိပါတယ်။ တစ်ခုက အသက်မွေးဝမ်းကြောင်းနဲ့ လယ်ယာ စိုက်ပျိုးရေးပါ။ အထူးသဖြင့် သိပ်ကို ဆင်းရဲကြတဲ့ ကျေးလက်ဒေသတွေ အတွက်ပါ။ ဒါ့အပြင် ပညာသင်ကြားခွင့် လက်လှမ်းမှီဖို့နဲ့ ကျန်းမာရေး ဖြစ်ပါတယ်။ အထူးသဖြင့် ငှက်ဖျား၊ အဆုပ်နာရောဂါ၊ အိပ်ခ်ျအိုင်ဗီ ရောဂါတွေ တိုက်ဖျက်ဖို့ ဖြစ်ပါတယ်။ ဒီအစီအစဉ်တွေကို တိုးချဲ့ပေးခြင်းအားဖြင့် လူ သန်းပေါင်းများစွာ အတွက် အထောက်အကူ ဖြစ်စေမှာဖြစ်ပါတယ်။”
မြန်မာနိုင်ငံကို ရောက်နေတဲ့ အီးယူ ဥရောပသမဂ္ဂရဲ့ ဖွံ့ဖြိုးမှုဆိုင်ရာ ကော်မရှင်နာမင်းကြီး Andris Piebalgs ဟာ မနေ့က ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူး အကြံပေးပုဂ္ဂိုလ် မစ္စတာ ဗီဂျေးနမ်ဘီယား နဲ့အတူ ရန်ကုန်အခြေစိုက် ကုလသမဂ္ဂ တာဝန်ရှိသူတွေအပြင် နိုင်ငံတကာ NGO တွေနဲ့လည်း တွေ့ဆုံပါတယ်။ မနက်ဖြန် ဖေဖော်ဝါရီလ ၁၄ ရက်နေ့မှာတော့ ရန်ကုန်မှာ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့လည်း တွေ့ဆုံဖို့ စီစဉ်ထားပါတယ်။
တရုတ်ဒုသမ္မတ အမေရိကန်ရောက်
By Khin Myo Thet
China’s Vice President Xi Jinpingတရုတ် ဒုသမ္မတ ရှီကျင်းပင် (Xi Jinping) ဟာ အမေရိကန် နိုင်ငံကို လေးရက်ကြာခရီး လာရောက်နေပါတယ်။ သူဟာ အမေရိကန် သမ္မတအိမ်ဖြူကိုလည်း သွားရောက်ဖို့ ရှိပါတယ်။
ဒီနှစ်ကုန်လောက်မှာ တရုတ်ကွန်မြူနစ်ပါတီရဲံ အကြီးအကဲ ဖြစ်လာမယ်လို့ မျှော်လင့်ရတဲ့ ရှီကျင်းပင်ဟာ တနင်္လာနေ့မှာ အဲချိုင်းနား Air China ဂျက်လေယာဉ်နဲ့ ၀ါရှင်တန်မြို့ပြင်က လေယာဉ်ကွင်းကို ဆိုက်ရောက်လာခဲ့ပါတယ်။ သူဟာ အင်္ဂါနေ့မှာ အမေရိကန် သမ္မတ ဘာရက် အိုဘားမား (Barack Obama) နဲ့ သမ္မတအိမ်ဖြူမှာ တွေ့ဆုံမှာဖြစ်ပါတယ်။
အမေရိကန်ပြည်ထောင်စာက အာရှဒေသမှာ စစ်အင်အား တိုးမြှင့်နေတာအတွက် ကန့်ကွက်ကြောင်း အမေရိကန် နိုင်ငံကို မလာခင်လေးမှာပဲ ဒုသမ္မတက သတိပေးခဲ့ပါတယ်။
အမေရိကန် နံမယ်ကြီး သတင်းစာ တစောင်ဖြစ်တဲ့ ၀ါရှင်တန်ပို့စ် (The Washington Post) ရဲ့ မေးမြန်းချက်ကို မစ္စတာရှီကျင်းပင်က ပြန်လည်ရေးသား ဖြေကြားရာမှာ အာရှနိုင်ငံတွေဟာ ငြိမ်းချမ်းရေးနဲ့ ဖွံ့ဖြိုး တိုးတက်ရေး ကို လိုလားတောင့်တ နေသူတွေမို့ အမေရိကန် ပြည်ထောင်စုက ဒေသတွင်း စစ်အင်အား တိုးမြှင့် ချထားတာနဲ့၊ ဒေသတွင်း စစ်ရေးမဟာမိတ် ခိုင်မာတိုးတက်အောင် လုပ်ဆောင် နေမှုတွေကို မလိုလားဘူးလို့ ဆိုပါတယ်။
အမေရိကန် သမ္မတ ဘားရက်အိုဘားမား ကတော့ တခြားဒေသတွေမှာ အမေရိကန်ပြည်ထောင်စုရဲ့ စစ်အင်အားကို ရုတ်သိမ်းဖို့ ရှိသလို အာရှဒေသမှာတော့ မဏ္ဍိုင်ပြုထားမယ်ဆိုတဲ့ အစီအစဉ်ကို ကြေငြာခဲ့ပါတယ်။
ကုလအကြံပေး Vijay Nambia နေပြည်တော်ရောက်
By မသင်းသီရိ
ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးအကြံပေး မစ္စတာ ဗီဂျေး နမ်ဘီးယား (Vijay Nambia) ဟာ ဒီကနေ့ နေပြည်တော်မှာ လူမှုဝန်ထမ်းနဲ့ ကယ်ဆယ်ရေး ၀န်ကြီးဌာန ၀န်ကြီးအပြင် ရွေးကောက်ပွဲနဲ့အတူ ပြည်ထောင်စု ငြိမ်းချမ်းရေး ကော်မရှင်တွေနဲ့လည်း တွေ့ဆုံပြီး မြန်မာ့အရေး ဆွေးနွေးခဲ့ပါတယ်။ ဒါ့အပြင် နေပြည်တော်မှာ ကျင်းပနေတဲ့ ဖွံ့ဖြိုးတိုးတက်ရေး မူဝါဒဆိုင်ရာ ညီလာခံကိုလည်း မစ္စတာ ဗီဂျေးနမ်ဘီးယား တက်ရောက်ခဲ့ပြီး ကုလသမဂ္ဂရဲ့ မြန်မာနိုင်ငံဆိုင်ရာ မူဝါဒနဲ့ အမြင်သဘောထား တွေကိုလည်း ရှင်းပြခဲ့ပါတယ်။ အခု မစ္စတာ ဗီဂျေးနမ်ဘီးယား ရဲ့ မြန်မာပြည်ခရီးစဉ် အကြောင်းနဲ့အတူ နေပြည်တော်မှာ လုပ်နေတဲ့ စီးပွားရေးဆိုင်ရာ ညီလာခံအကြောင်းတွေကို မသင်းသီရိက စုစည်းတင်ပြထားပါတယ်။
ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးအကြံပေး မစ္စတာ ဗီဂျေးနမ်ဘီးယား ဟာ မနေ့ ဖေဖော်ဝါရီ ၁၂ ရက် တနင်္ဂနွေနေ့က မြန်မာနိုင်ငံကို ရောက်ခဲ့တာဖြစ်ပြီး ဒီကနေ့ ဖေဖော်ဝါရီ ၁၃ ရက် တနင်္လာနေ့ မနက်မှာတော့ နေပြည်တော်က အစိုးရပိုင်း တာဝန်ရှိသူတချို့နဲ့ တွေ့ဆုံတယ်လို့ ရန်ကုန်အခြေစိုက် ကုလသမဂ္ဂရုံးက ပြန်ကြားရေး တာဝန်ခံ ဦးအေးဝင်းက ဗွီအိုအေ မြန်မာပိုင်းကို အတည်ပြု ပြောပါတယ်။ ဒါပေမဲ့ ဘယ်လို အကြောင်းအရာတွေကို ဆွေးနွေးတယ် ဆိုတာကိုတော့ မစ္စတာ ဗီဂျေးနမ်ဘီးယား ဆီကနေ မသိရသေးပါဘူးလို့လည်း ပြောပါတယ်။
“ဗီဂျေးနမ်ဘီးယားက ဒီနေ့ မနက်ကတော့ ပြည်ထောင်စု ငြိမ်းချမ်းရေး ကော်မရှင်နဲ့ တွေ့ပါတယ်ခင်ဗျ။ နောက်ပြီးတော့ လူမှုဝန်ထမ်းနဲ့ ကယ်ဆယ်ရေး ဝန်ကြီးဌာန၊ အလုပ်သမားရေးရာ ဝန်ကြီး၊ ပြည်ထောင်စု ဝန်ကြီး ဦးအောင်ကြည်နဲ့ တွေ့တယ်။ ပြီးတော့ ရွေးကောက်ပွဲ ကော်မရှင်နဲ့ တွေ့တယ်။ ပြီးတော့ နယ်စပ်ရေးရာ ဝန်ကြီးဌာန ဝန်ကြီးနဲ့ တွေ့တယ်။ နောက်ပြီးတော့ ကြံ့ခိုင်ဖွံ့ဖြိုးရေး ပါတီနဲ့ တွေ့ပါတယ်ခင်ဗျ။”
မနက်ဖြန်မှာလည်း မစ္စတာ နမ်ဘီးယားဟာ နေပြည်တော်မှာပဲ ဆက်ရှိနေမှာဖြစ်ပြီး နောက်ထပ် အစိုးရ အဖွဲ့ထဲက တာဝန်ရှိသူတွေ လွတ်တော်တွင်းက တာဝန်ရှိသူတွေနဲ့လည်း တွေ့ဆုံမှာ ဖြစ်တယ်လို့ ပြောပါတယ်။ ဒါ့အပြင် မစ္စတာ ဗီဂျေးနမ်ဘီးယား ဟာ နေပြည်တော်က MICC မှာ ကျင်းပနေတဲ့ စီးပွားရေး ဖွံ့ဖြိုးတိုးတက်မှု မူဝါဒဆိုင်ရာ ညီလာခံကိုလည်း တက်ရောက်ခဲ့ပါတယ်။ ဒီညီလာခံဟာ ဖေဖော်ဝါရီလ ၁၃ ရက်နေ့ကနေ ၁၆ ရက်နေ့အထိ ၃ ရက်ကြာ ကျင်းပမယ့် ဖွံ့ဖြိုးတိုးတက်ရေး ဆိုင်ရာ ညီလာခံ ဖြစ်ပြီး အဲဒီမှာ မစ္စတာ နမ်ဘီးယားက လက်ရှိ မြန်မာနိုင်ငံရဲ့ အနေအထားတွေပေါ် ကုလသမဂ္ဂရဲ့ သဘောထားတွေကို ရှင်းပြသွားတယ်လို့ ဒီညီလာကို တက်ရောက်နေတဲ့ ဗဟုအဖွဲ့က ဦးဇော်ဦးက ပြောပါတယ်။
“သူကတော့ ဒီ နိုင်ငံရေးအရ ဖွံ့ဖြိုးတိုးတက်မှု ဖြစ်လာတဲ့ဟာကို ဇောင်းပေးပြီး ပြောသွားတာပဲလေ။ ဒီ စီးပွားရေး ဖွံ့ဖြိုးမှုနဲ့ နိုင်ငံရေး ဖွံ့ဖြိုးမှုကလည်း ဆက်စပ်နေတယ်။ ဒီစီးပွားရေး ဖွံ့ဖြိုးမှု နောက်ကနေ ထပ်ချပ်မကွာ လိုက်လာပြီးတော့ တကယ် အဓိပ္ပာယ်ရှိတဲ့ ဖွံ့ဖြိုးမှု တစ်ခုဖြစ်လာအောင် ဘယ်လိုလုပ်ကြမလဲ ဆိုတာကို ကျနော်တို့ ဦးစားပေး ဆွေးနွေးတာဖြစ်တဲ့ အတွက်ကြောင့် သူ့အနေနဲ့ကလည်း သူရဲ့ နိုင်ငံရေးအရ ကြားဝင် ဆောင်ရွက်မှုတွေ၊ အောင်မြင်မှုတွေ၊ ဒါတွေဟာ အထောက်အကူ ပြုနေတယ် ဆိုတဲ့ ကိစ္စကိုလည်း သူက ပြောသွားတဲ့ဟာကို ကျနော်တို့ နားထောင်ခဲ့ရပါတယ်။”
ဒါ့အပြင် ဒီညီလာခံကို အခု မြန်မာနိုင်ငံကို ရောက်နေတဲ့ အီးယူ ဥရောပသမဂ္ဂရဲ့ ဖွံ့ဖြိုးမှုဆိုင်ရာ ကော်မရှင်နာ မင်းကြီး Andris Piebalgs လည်း တက်ရောက်ခဲ့ပြီး အီးယူကနေ မြန်မာနိုင်ငံကို နောက်ထပ်တိုးပေးမယ့် အကူအညီ ကိစ္စတွေကိုလည်း ရှင်းပြသွားတယ်လို့ ပြောပါတယ်။
“အဓိက ကတော့ ဒီ အီးယူက မြန်မာနိုင်ငံမှာ ပြောင်းလဲနေတဲ့ ဖြစ်စဉ်အပေါ်မှာ အင်မတန်မှ ကျေနပ် အားရမှုရှိတယ်။ ပြီးရင် လာမယ့်နှစ်ကနေ စပြီး နောင် ရေရှည် အတွက် ဖွံ့ဖြိုးမှုတွေ အတွက်မှာ သူတို့ အနေနဲ့ ကူညီနိုင်မယ့် အစီအစဉ်တွေကိုပါ အခုကတည်းက တပါတည်း စဉ်းစားနေတယ်။ နိုင်ငံတကာ အကူအညီပေးတဲ့ အဖွဲ့အစည်းတွေရဲ့ ရှေ့မှာပဲ ကျနော်တို့ လုပ်နိုင်မယ့် အနေအထားတွေကို ပွင့်ပွင့်လင်းလင်း ဆွေးနွေးကြတာ ဖြစ်တဲ့အတွက်ကြောင့် သူတို့ အနေနဲ့လည်း ဒါကို စဉ်းစားပြီးတော့ ပိုပြီး ကူညီနိုင်မယ့် လမ်းစတွေ ပွင့်လာတာကို တွေ့ရတယ် ဆိုပြီး ပြောသွားပါတယ်။”
ဒါ့အပြင် UNDP ရဲ့ လက်ထောက် အုပ်ချုပ်ရေးမှူး အာဂျေး ချီးဘာ (Dr. Ajay Chhibber) လည်း တက်ရောက်ပြီး ဆွေးနွေး ပြောဆိုခဲ့ပါတယ်။
ဒီညီလာခံဟာ မြန်မာနိုင်ငံမှာ စီးပွားရေး တိုးတက်လာအောင် ပြုပြင် ပြောင်းလဲမှုတွေ လုပ်နေရုံတင်မကဘဲ ကျန်းမာရေးနဲ့ ပညာရေး ဘက်တွေကိုပါ အထောက်အကူ ပြုဖို့အတွက် ဦးစားပေး ဆွေးနွေးကြတာ ဖြစ်ပါတယ်။ ဒီညီလာခံကို နိုဘဲလ်ဆုရ ဒေါက်တာ ဂျိုးဇက် စတစ်ဂလစ် (Dr.Joseph Stiglitz ) နဲ့ အတူ မြန်မာစီးပွားရေး ပေါမောက္ခဟောင်းတွေ ဖြစ်ကြတဲ့ ဦးလှမြင့်၊ ဦးရော်နယ်ဖင်လေး အပြင် သမ္မတရဲ့ စီးပွားရေးအကြံပေး ဦးမြင့် အပြင် တခြား နိုင်ငံတကာ နဲ့ ပြည်တွင်းက စီးပွားရေးပညာရှင်တွေနဲ့အတူ အစိုးရ ပိုင်းတွေပါ တက်ရောက် ဆွေးနွေးနေကြတာ ဖြစ်ပါတယ်။
အဲဒီမှာ စီးပွားရေးပညာရှင် ဒေါက်တာ ဂျိုးဇက် စတစ်ကလစ်က မြန်မာနိုင်ငံအတွက် အကြံပြုချက် ၆ ချက်နဲ့ ဆွေးနွေးသွားတယ် လို့လည်း ဦးဇော်ဦးက ပြောပါတယ်။
“နံပါတ်တစ်က ကျနော်တို့ ဒီလယ်ယာ ကဏ္ဍဖွံ့ဖြိုးမှုကို ဆက်ပြီး လုပ်ဖို့လိုတယ်။ နောက်တစ်ချက်က ကျနော်တို့ ဝင်ရောက်လာတဲ့ အထူးသဖြင့် သဘာဝ အရင်းအမြစ်တွေကနေ ရလာမယ့် ဘဏ္ဍာငွေတွေ အပေါ် သုံးစွဲမှုအပေါ်မှာ ပိုပြီးတော့ ခြိုးခြိုးခြံခြံ အကျိုးရှိရှိ အသုံးချနိုင်ဖို့ အရေးကြီးတယ်၊ လူသားအရင်းအမြစ် တွေကို ပြုစုပျိုးထောင်ရေးကလည်း ပထမ အရေးကြီးတယ်။ ဒီနေရာမှာ ကျန်းမာရေး နဲ့ ပညာရေး ကဏ္ဍအပေါ်မှာ ပိုပြီး အကျိုးရှိရှိ အသုံးချနိုင်တယ် ဆိုတာကလည်း အစိုးရ လုပ်ငန်းစဉ်တစ်ခု ဖြစ်တယ်။ နောက်ပြီးတော့ နိုင်ငံတကာနဲ့လည်း ကျနော်တို့ ပူးပေါင်း ဆောင်ရွက်မှုတွေ လုပ်ဖို့ လိုတယ်။ အဲဒါတွေ လုပ်မယ် ဆိုရင်တော့ ကျနော်တို့ နိုင်ငံဟာ အောင်မြင်နိုင်တဲ့ နိုင်ငံတစ်ခု ဖြစ်လာနိုင်တယ် ဆိုပြီးတော့ ပြောသွားတာ တွေ့ရပါတယ်။”
ဗဟုအဖွဲ့က ဦးဇော်ဦး ဖြစ်ပါတယ်။ ၃ ရက်ကြာ ကျင်းပနေတဲ့ ဒီညီလာခံကို မြန်မာအစိုးရနဲ့အတူ ရန်ကုန်အခြေစိုက် ကုလသမဂ္ဂရုံးအပြင် သမ္မတ အကြံပေးအဖွဲ့က ဦးမြင့်ရဲ့ MDRI အဖွဲ့နဲ့အတူ အီးယူကလည်း ပံ့ပိုးကူညီခဲ့တယ်လို့ ဒီပွဲကို စီစဉ်သူတွေက ပြောသလို နိုင်ငံတကာနဲ့ ပြည်တွင်းကပါဆိုရင် ဦးရေ ၄၀၀ နီးပါး တက်ရောက်ခဲ့တယ်လို့လည်း ပြောပါတယ်။
0 comments:
Post a Comment