မြန်မာနိုင်ငံနှင့် အမေရိကန်ပြည်ထောင်စုတို့၏ သွားလာဆက်ဆံရေးသည် လတ်တလောဖြစ်စဉ်များအရ ပိုမို ကောင်းမွန်သည့် ခြေလှမ်းများ ဖြစ်လာကြောင်း သုံးသပ်သူများက ပြောသည်။
မြန်မာနိုင်ငံသို့ ပြီးခဲ့သည့် သီတင်းပတ် အတွင်းက ရောက်ရှိလာသည့် အမေရိကန်ပြည်ထောင်စု၏ မြန်မာနိုင်ငံဆိုင်ရာ အထူး ကိုယ်စားလှယ်နှင့် မူဝါဒရေးရာ ညှိနှိုင်းရေးမှူး မစ္စတာ ဒဲရစ်မစ်ချယ်၏ ခရီးစဉ်အပါအ၀င် မြန်မာနိုင်ငံသို့လာ ရောက်လည်ပတ်ခဲ့သည့် အမေရိကန် ပြည်ထောင်စုမှ ကိုယ်စားလှယ်များ ဖြစ်သော အထက်လွှတ်တော် အမတ် ဂျွန်မက်ကိန်း၊ မစ္စတာ ဂျိုးဇက်ဝိုင်ယွန်း တို့လာရောက်လာခဲ့မှုတို့နှင့် ပတ်သက်ပြီး မြန်မာနိုင်ငံအပေါ် နိုင်ငံတကာက အမြင်သည် ပြောင်းလဲလာပြီဖြစ်ကြောင်း ၎င်းတို့က ပြောသည်။
ဒီမိုကရေစီနည်းဖြင့် တိုင်းပြည် နိုင်ငံရေးပြောင်းလဲမှု လုပ်နေသည့် မည်သည့် နိုင်ငံကိုမဆို အမေရိကန်ပြည်ထောင်စုက ကူညီဆောင် ရွက်ပေးနေခြင်းကြောင့် မြန်မာနိုင်ငံသို့လည်း ထိုနည်းလည်း ကောင်း ထိတွေ့ဆက်ဆံလာခြင်း ဖြစ်ကြောင်း သုံးသပ်ပြောဆိုကြ သည်။
"မစ္စတာဒဲရစ်မစ်ချယ်ရဲ့ ခရီးစဉ်ကြောင့် နှစ်နိုင်ငံရဲ့ ဆက်ဆံရေးလည်း ပိုပြီးကောင်းမွန်လာမှာပါ။ သူ့ရဲ့ မြန်မာ နိုင်ငံနဲ့ ပတ်သက်ပြီး တင်သွင်းချက်တွေ က သမ္မတအိုဘားမားဆီကို အတား အဆီးမရှိပဲ တိုက်ရိုက်ရောက်ရှိမှာ ဖြစ်ပါတယ်"ဟု နိုင်ငံတော်သမ္မတ အကြံပေး ဦးကိုကိုလှိုင်က ပြောသည်။
"သူ့ရဲ့ခရီးစဉ်မှာ အစိုးရအရာရှိတွေ သာမကပဲ တခြား လူမှုရေး အဖွဲ့အစည်းတွေနဲ့လည်း တွေ့ခဲ့ရတာဖြစ်လို့ လက်ရှိ အနေအထားကို သူကောင်းကောင်း နားလည်သွားမှာ ဖြစ်ပါတယ်" ဟု ၎င်းက ဆက်လက်ပြောသည်။ သူကဆက်လက် ပြောဆိုသည်မှာ မြန်မာနိုင်ငံ သည် ကမ္ဘာ့အင်အားကြီး နှစ်နိုင်ငံဖြစ်သည့် တရုတ်နှင့် အမေရိကန် တို့အကြားတွင် ရောက်ရှိနေပြီ ဖြစ်သော်လည်း ထိုနှစ်နိုင်ငံများနှင့် ခိုင်မာသော ဆက်ဆံရေး ရှိနေသမျှ ကာလပတ်လုံး အကျိုးရှိနေမည်သာ ဖြစ်သည်ဟု သုံးသပ်ပြောဆိုခဲ့သည်။
"ဒါပေမယ့် ဒီကိစ္စနဲ့ ပတ်သက်ပြီး ကိုယ့်တိုင်းပြည် အကျိုးစီးပွားအတွက်တော့ ချိန်ညှိရမှာပါ"ဟု ဦးကိုကိုလှိုင် ကပြောသည်။
မြန်မာနိုင်ငံသည် အခြားပြည်ပနိုင်ငံများနှင့် ဆက်ဆံရာတွင် တည့်မတ်စွာ ကြားနေရေး မူဝါဒကိုသာ ကျင့်သုံးခဲ့ကြောင်း ၎င်းကထပ်မံ ပြောဆိုသည်။
ဒေါ်အောင်ဆန်းစုကြည်၏ စက်တင်ဘာလ ဒုတိယပတ်အတွင်း မြန်မာတိုင်း(မ်) နှင့် တွေ့ဆုံစဉ် ပြောကြားချက်အရ မြန်မာ-အမေရိကန် ဆက်ဆံရေး ပြောင်းလဲလာမှုအပေါ် ၎င်း၏ သဘောထားမှာ ကောင်းမွန်သည့် အမြင်ရှိနေသည်ကို တွေ့ရသည်။
"အစကတည်းက စေ့စပ်ရေးမူကို သဘောတူတယ်။ ဘာပဲပြောပြော တစ်ဦးနဲ့တစ်ဦး ဆက်သွယ်မှုရှိမှ တိုးတက်မှုရှိနိုင်မှာပေါ့။ ဆက်သွယ်မှု မရှိပဲ ဘယ်လိုမှ တိုးတက်မှု မရှိနိုင်ဘူး" ဟု ၎င်းက ပြောသည်။
ထို့ပြင် ဆက်လက်ပြောသည်မှာ စေ့စပ်မှုသည် တစ်ဖက်တည်းနှင့် ဆောင်ရွက်ခြင်းမဟုတ်ပဲ ဒီမိုကရေစီဘက်၊ အစိုးရဘက် စသည်ဖြင့် အဘက်ဘက်က လုပ်မှသာ တိုးတက်နိုင်မည်ဟု ဆိုသည်။
"ကျွန်မကတော့ ကြိုက်ပါတယ်။ ဖြစ်သင့်တယ်လို့လည်း ထင်တယ်၊ မစ္စတာ မစ်ချယ်လာတာကိုလည်း ၀မ်းသာပါတယ်"ဟု ၎င်းကပြောသည်။
မြန်မာ- အမေရိကန်၏ ဆက်ဆံရေး သည်ယခင်ထက် ပိုမိုပွင့်လင်းလာသည် ဟု သုံးသပ်မိကြောင်းလည်း အမေရိကန်နိုင်ငံ ဗီအိုအေ သတင်းဌာန၏ သတင်းအယ်ဒီတာ ဒေါ်ခင်စိုးဝင်းက မစ္စတာမစ်ချယ်၏ ခရီးစဉ်အတွင်း လာရောက်သတင်းယူစဉ် ပြောသည်။
"မြန်မာနိုင်ငံအနေနဲ့ အမေရိကန် နိုင်ငံနဲ့ အပြုသဘောဆောင်ဆက်ဆံ လာတာဟာ တစ်နိုင်ငံလုံး အတွက်လည်း အကျိုးရှိပါတယ်။ အမေရိကန်နိုင်ငံရဲ့ အခန်းကဏ္ဍကတော့ တစ်ကမ္ဘာလုံးမှာ အရေးကြီးပါတယ်။ အမေရိကန်နဲ့ ဆက်ဆံရေး ကောင်းခြင်းအားဖြင့် ကောင်းကျိုးတွေပဲရနိုင်သလို ဆိုးခြင်း အားဖြင့်လည်း လောလောဆယ် တားဆီးပိတ်ဆို့မှုတွေ ရှိနေတုန်းပါ" ဟု ပြောသည်။
အင်အားကြီးနှစ်နိုင်ငံအနက် မြန်မာ နိုင်ငံ၏ အနေအထားသည် တရုတ်ပြည်နှင့် ပိုမိုထိစပ်မှုရှိသည့်အတွက် ၎င်းနိုင်ငံ၏ ဩဇာ သက်ရောက်မှု ပိုရှိနိုင်မည်ဟု ယူဆကြောင်းလည်း ဒေါ်ခင်စိုးဝင်းက ပြောသည်။
"အမေရိကန်ဟာ အဝေးမှာ ရှိနေသလို မြန်မာနိုင်ငံအပေါ် အမေရိကန်ရဲ့ အကျိုးစီးပွားဟာလည်း အရမ်း အလှမ်းဝေးလွန်းနေတယ်။ စီးပွားရေးနဲ့ ပတ်သတ်ပြီးလည်း သိပ်မပြောပလောက် ဘူး"ဟု ၎င်းက ပြောသည်။
သို့သော် အမေရိကန်၏ မြန်မာနိုင်ငံနှင့် ပတ်သက်ပြီး အဓိက ဆက်သွယ် လာရခြင်းသည် ယင်းတို့၏ အခြေခံမူ တစ်ခုဖြစ်သည့် ဒီမိုကရေစီထွန်းကားရေးကို အားပေးရန်အတွက်သာ ဖြစ်သည်ဟု ၎င်းက သုံးသပ်သည်။
"လူ့အခွင့်ရေးနဲ့ ဒီမိုကရေစီရေးကို တိုးတက်အောင်လုပ်ဖို့ ၀င်ပါတာပါ။ မြန်မာတင်မကပါဘူး၊ ဒီမိုကရေစီရေးနဲ့ ပတ်သက်ပြီး အမေရိကန်က ပါဝင်ပတ်သက်တာ တခြားနိုင်ငံတွေလည်း ရှိနေပါတယ်"ဟု ဒေါ်ခင်စိုးဝင်းက ပြောသည်။
0 comments:
Post a Comment